எண்ணெய் மற்றும் இயற்கை எரிவாயுக் கழகம் என்பது இந்திய அரசாங்கத்தின் பெட்ரோலியம் மற்றும் இயற்கை எரிவாயு அமைச்சகத்தின் கீழ் உள்ள ஒரு பொதுத்துறை நிறுவனம் ஆகும். இதன் தலைமையகம் தில்லியில் அமைந்துள்ளது. ஓ.என்.ஜி.சி ஆகஸ்ட் 1956 ஆம் ஆண்டு ஆகஸ்ட் 14 ஆம் நாள் தொடங்கப்பட்டது. ஓ.என்.ஜி.சி நாட்டின் மிகப்பெரிய எரிவாயு கண்டறிதல் மற்றும் உற்பத்தி நிறுவனமாகும். உள்நாட்டு கச்சா எண்ணெய் உற்பத்தியில் 70 சதவீதமும், இயற்கை எரிவாயு உற்பத்தியில் 84 சதவீதமும் ஓ.என்.ஜி.சியால் உற்பத்தி செய்யப்படுகிறது. ஓ.என்.ஜி.சி ஒட்டுமொத்த எண்ணெய் மற்றும் எரிவாயு உற்பத்தித் தொழிற்றுறையுடன் செங்குத்து இணைவு முறையில் ஒருங்கிணைக்கப்பட்டுள்ளது. 2010 ஆம் ஆண்டு நவம்பரில் இந்திய அரசாங்கத்தால் ஓ.என்.ஜி.சிக்கு மகாரத்னா தகுதி வழங்கப்பட்டது. 2019–20 ஆம் நிதியாண்டில் இந்திய அரசாங்கத்தால் நடத்தப்பட்ட கருத்துக்கணிப்பில் ஓ.என்.ஜி.சி இந்தியாவின் மிகப்பெரிய ஒன்றிய பொதுத் துறை நிறுவனமாகத் தரவரிசைப்படுத்தப்பட்டது. பிளாட்டிஸ் வெளியிட்ட தரவரிசையில் உலகளவில் 250 முன்னணி ஆற்றல் நிறுவனங்களில் 5 ஆம் இடத்தைப் பெற்றது, இந்தியாவில் உள்ள 26 வண்டல் வடிநிலங்களில் ஹைட்ரோகார்பன்களைக் கண்டறிந்து எடுக்கும் பணிகளில் ஓ.என்.ஜி.சி ஈடுபட்டுள்ளது. நாடு முழுவதும் 11,000 கிலோமீட்டர் எரிவாயுக் குழாய்கள் ஓ.என்.ஜி.சிக்குச் சொந்தமானதாக இயங்கி வருகின்றன. Wikipedia