அடோபி சிஸ்டம்ஸ் இன்கார்பரேட்டட் அமெரிக்காவில் உள்ள கணினி மென்பொருள் தயாரிப்பு நிறுவனம் ஆகும். இது கலிபோர்னியாவில், சான் ஹூசேவைத் தலைமையகமாகக் கொண்டது. இந்த நிறுவனம் பல்லூடகம் மற்றும் படைப்பாக்க மென்பொருள்கள் தயாரிப்பில் ஈடுபட்டு வந்தது. சமீபகாலமாக இணையதள பயன்பாட்டு மென்பொருள் உருவாக்கத்தில் சிறப்பான வகையில் ஈடுபட்டு வருகிறது. 1982 ஆம் ஆண்டு டிசம்பர் மாதத்தில், ஜான் வார்னாக் மற்றும் சார்லஸ் ஜெஸ்க் என்பவர்களால் அடோபி நிறுவனம் உருவாக்கப்பட்டது. இவர்கள் ஜெராக்ஸ் பார்க் என்ற நிறுவனத்தை விட்டு விலகி இந்நிறுவனத்தை உருவாக்கினர். 1985 ஆம் ஆண்டு ஆப்பிள் கம்ப்யூட்டர் நிறுவனம் போஸ்ட்ஸ்க்ரிப்டு தொழிநுட்பத்தின் உரிமத்தைப் பெற்று, அதனை தனது அச்சியந்திரங்களுக்குப் பயன்படுத்தியது. இது மேசைத்தள பிரசுரத்தில் ஒரு புரட்சியை ஏற்படுத்தியது. இந்நிறுவனத்தின் பெயரான அடோபி என்பது, கலிபோர்னியா, லாஸ் ஆல்டோஸ்சில் உள்ள இந்நிறுவனத்தை நிறுவியவர்களில் ஒருவரது வீட்டிற்கு பின்புறம் ஓடிய அடோபி கிரீக் என்கிற ஓடையின் பெயரிலிருந்து உருவானது. டிசம்பர் 2005 ஆம் ஆண்டு, அடோபி தனது போட்டி நிறுவனமான மேக்ரோமீடியாவை கையகப்படுத்தியது. இது அடோபி கோல்ட்ஃப்யூஷன், அடோபி ட்ரீம்வீவர், அடோபி ஃப்ளாஷ் மற்றும் அடோபி ஃப்ளக்ஸ் என அதனது தயாரிப்புகளின் பட்டியலை அதிகரிக்க உதவியது. Wikipedia