ტალინის პორტი — ესტონეთისა და ბალტიის ქვეყნების უდიდესი საპორტო კომპანიაა, რომელსაც ოთხი პორტი აქვს. ტალინის პორტს ეკუთვნის ორი სამგზავრო პორტი და ორი სატვირთო პორტი. როგორც მგზავრთა რაოდენობის, ისე სატვირთო ნაკადების გათვალისწინებით, ტალინის პორტი ასევე ერთ-ერთი უდიდესი საპორტო კონცერნია ბალტიის ზღვის სანაპიროზე. კომპანიას ასევე ეკუთვნის პორტების მახლობლად მდებარე მუგას, პალდისკის სამხრეთ პორტისა და საარემაას ინდუსტრიული პარკები და ყინულმტეხი „ბოტნიკა“. პალიასარეს პორტი სატვირთო პორტია, რომლის გასხვისებასაც აპირებს ტალინის პორტი. ეს არის წლის განმავლობაში სანაოსნო და ადვილად მისადგომი პორტები. მუგას პორტი საკმარისად ღრმაა იმისათვის, რომ მიიღოს ყველა გემი, რომელიც დანიის სრუტეებს გადის. ტალინის პორტი მომსახურებას სთავაზობს landlord-ბიზნეს მოდელის საფუძველზე, ანუ ფლობს, მართავს და ავითარებს ნავმისადგომებს, აკვატორიუმებს და მათ მიმდებარე ტერიტორიებს, აქირავებს მიწას სატვირთო ოპერატორებზე, არეგულირებს გემების მოძრაობას აკვატორიუმებში და უზრუნველყოფს უსაფრთხო ნავიგაციას პორტის წყლებში. ტალინის პორტს ეკუთვნის სამგზავრო ტერმინალები და მგზავრების მომსახურებისთვის საჭირო სხვა ნაგებობები, ხოლო სატვირთო პორტებში სუპერსტრუქტურა ეკუთვნის სატვირთო ოპერატორებს. Wikipedia